Búmba! 35vikur
Það er aldeilis farið að síga á seinni hlutann hjá mér og bumba litla, það er farið að þrengja vel að litla manninum og rifbeinin mín þurfa að snúa vörn í sókn ef þau ætla að komast óbrotin í gegnum síðustu vikurnar. Grindin hefur verið nokkuð þæg upp á síðkastið enda hef ég verið dugleg að passa mig og beita mér rétt með örfáum undantekningum. Er byrjuð í meðgöngujóga sem er algjör unaður: róandi tónlist, teygjur, hugleiðsla og svo nuddpotturinn á eftir, er hægt að biðja um það betra. Er búin að skila inn fæðingarplaninu mínu til ljósmóðurinnar, það var ekki langt enda er planið að hafa þetta ekkert of langt.
Ég er komin á gott skrið með lokaverkefnið, forritið er komið til leiðbeinendanna í beta prófun og vona ég bara að ég fái feedback sem fyrst þar sem ég er í soddan kappi við tímann að klára þetta fyrir fæðingu.
Hrafnkell er ávallt í banastuði og virðist njóta þess ágætlega að vera fastur með gamla settinu alla daga. Það var hringt í okkur frá leikskólanum hans og okkur tilkynnt að það væri laust pláss 2 daga í viku í Toddler 1 sem er sama deild og hann var á í vor, þvílíkar gleðifréttir að hann komist aftur til sömu fóstra og krakka sem hann þekkir. Uppáhaldsorðin hans eru ennþá amma og afi, og bókin sem við keyptum í Leifstöð sem heitir einmitt: "Hjá afa og ömmu" er búin að vera í miklu uppáhaldi síðan við komum aftur til Boston. Hann er allur að verða fullorðinn og sjálfbjarga, borðar fiskinn sinn aleinn með gaffli og drekkur mjólkina sína úr glasi. En milli þess að verða fullorðinn heldur hann áfram að kanna heiminn á sinn eigin hátt, um daginn setti hann samfelluna yfir hausinn og reyndi að bíta í melónu í gegnum efnið.. og svo er líka sniðugt að hella úr mjólkurglasinu á borðið og sulla í mjólkurpollinum og búa til flott mynstur!
Við neyddumst til að fá okkur internet, þjófnaðurinn var ekki lengur nógu áreiðanlegur, skelltum okkur því á svona þrípakka, internet, háskerpusjónvarp og heimasíma. Þetta er svosem ekki fásögu færandi nema fyrir það að með háskerpuboxinu fylgir "on demand" sjónvarpsefni, alls kyns þættir og bíómyndir sem hægt er að horfa á frítt eftir pöntunum. Þetta höfum við nýtt fyrir Hrafnkel þar sem úrvalið af barnaefni er með eindæmum. Klukkan 6 í kvöld var komið að barnatíma fyrir Hrafnkel, pabbinn sest með syninum fyrir framan skjáinn og ákveður að velja eitthvað nýtt og spennandi fyrir aðalprinsinn. Sponge Bob Squarepants verður fyrir valinu, öðru nafni: Svampur Sveinson, en það var ekki betra val en svo að eftir nokkrar mínútur kallar Gummi á mig, gáttaður situr hann með Hrafnkel í fanginu, þegar ég var búin að horfa á skjáinn í nokkrar sekúndur var ég farinn að hrópa á Gumma: Slökktu á tækinu! Slökktu á tækinu! Og á meðan horfði ég á son minn furðu lostinn með augun límd í átt að sjónvarpinu sem mér fannst vera að eitra huga hans meira með hverri sekúndu sem leið. Í sjónvarpinu var Górilla, (nota bene þetta var leikið atriði ekki teiknimynd) sem hafði tekið tvo vini hans Svamps Sveinssonar og sett þá í brúnan hermannapoka, lokað vel fyrir og svo byrjaði górillan barasta að kíla pokann á fullu, eftir miklar kílingar byrjar górillan að hoppa á pokanum.. ekki fannst górillunni það nóg svo hún nær í stól og fer að berja pokann á alla kanta með stólnum, og já af öllu afli!! Þetta verður seint gleymt og fær mann til að íhuga bréfasendingu til Nick Jr. stöðvarinnar sem sér um útsendingar á þessu sjónvarpsefni. Þannig að skilaboð mín til foreldra nær og fjær, Horfið með börnunum ykkar.
yfir og út
